Колледжімізде WorldSkills кәсіби чемпионатына іріктеу мақсатында колледжішілік байқау өткізілді. Байқаудың негізгі мақсаты – студенттердің кәсіби шеберлігін арттыру, заманауи талаптарға сай дағдыларын дамыту және үздіктерді анықтау болды.

Сайысқа бастауыш білім беру педагогикасы мен әдістемесі  мамандығы бойынша білім алатын студенттер қатысып, өз құзыреттіліктерін тәжірибелік тапсырмалар арқылы көрсетті. Қатысушылар жұмысты орындау барысында техникалық қауіпсіздік ережелерін сақтап, уақытты тиімді пайдалану және сапалы нәтиже көрсету бойынша бағаланды.

Әділқазылар алқасы әр қатысушының кәсіби деңгейіне, шығармашылық қабілетіне және сауаттылық қырына ерекше назар аударды. Нәтижесінде үздік деп танылған студенттер алдағы WorldSkills чемпионатының келесі кезеңіне жолдама алды.

Аталған байқау студенттердің өз мамандығына деген қызығушылығын арттырып, болашақ білікті маман ретінде қалыптасуына үлкен серпін берді.